الصفحات
الكاملة
تيوب
الدستور
رسالة جلالة
الملك للدستور
موقع
زوار الأردن
موقع
جلالة الملكة
موقع
جلالة الملك

حاب يكون على راسك ريشة ..؟!

كامل النصيرات

الأربعاء 9 أيار / مايو 2018.
عدد المقالات: 603

صارحني يا مواطن ..احكيلي ..فضفضلي ..ما تخبّي عليّ ..أنا بدّي مصلحتك ..شاعر إنك ماكل هوا .. وشاعر إن الهوا مغشوش كمان ..؟ حاب تقوم الصبح هيك ؛ وتلاقي حالك بيك ..؟ حاب يكون على راسك ريشة ..؟ عن جد حاب يكون على راسك ريشة ..؟؟!! ولا يهمّك ..وأنا أخوك لأعطيك طريقة يكون على راسك مش ريشة وحدة وبس ؛ ألف ريشة إذا بدّك ..!!
شوف عليّ ..اصحى من الصبح ..البس أجمل ثيابك ..قف أمام المراية ..قل  أبوك يا الدنيا ..!! مسّد ما استطعت على شواربك ..وإذا ما فيش شوارب تقدر تنكش مناخيرك بدالهن ..المهم لازم تعمل حركة استعراضية قدام المراية تقنع حالك انك مش مواطن ( خشخيشة او شخشيخة )..وإنك تقدر ترفع مناخيرك ( إللي نكشتهن ) للسما ..وإنك تقدر ما تشوف حدا بعينك إذا نويت ..!!
هسة ..اطلع من الدار ..زي كل يوم ..رد السلام على الجميع بذل ..خلي صوتك متهدج و بيرجف زي دايماً ..وظلّك ماشي لحد ما تروح على تاع الجاج ..رح تلاقي كثير ريش منتوف و مرمي على الأرض ..خذ قد ما بدّك ..وحط على راسك يا مواطن لما تقول بس ..وبعد ما تحط و تخلِّص ..امشي في الشارع مرة ثانية ..لا ترد السلام على حدا ..ارفع راسك فوق ..وإذا حدا رد عليك السلام ؛ حاول تخلّي حالك مش سامع.. وإذا بدك ترد ولا بُد فقل من روس خشومك : أهلين ..!! لأنك على راسك ريشة ..!!
الآن ..استغل وضعك ..وقم بجولة على أي وزارة تريدها حتى لو كانت وزارة الخارجية ..امشي كالطاووس ..فأنت على راسك ريشة ..لا تنظر إلى أي أحد ..وتذكر دائما أن مناخيرك بالسما و مش شايف حدا ..!! تمختر في موسيقى مشيتك ..عش بإحساس إللي على راسو ريشة عن جد ...لما تزهق و تمل ..نزِّل راسك شوية ..اخفض من مستوى مناخيرك ..حاول أن تنظر للناس الآن ...ماذا سترى ..سترى في كل مكان مواطنين زيك زيهم ..يضعون كمان ريش ..ويجوز ولولا مخافة الله لأقولك إنهم جابوا الريش من عند نفس بيّاع الجاج ...!!!!

رئيس مجلس الإدارة: محمد داوودية - رئيس التحرير المسؤول: مصطفي الريالات - المدير العام: الدكتور حسين العموش